Заманалар булған элгәре,

Булған илдең батыр улдары...

Ә ни өсөн булған, дөрөҫ түгел,

Булған, бар һәм буласаҡ

Беҙҙең илдең батыр улдары!

Әсә тапҡан ике ул:

Ҙурыһына ун алты, икенсеһенә алты,

Ә кесеһе, кинйәһе, әле тыуып етмәне

Донъяларҙа ни барын ҡарында ҡарап ятты.

Ҙурыһына ваҡыт еткәс “военкомға” саҡыртып

Пеләш башлы бер ағай, эре генә күҙ ташлай:

-Тәк-тәк энем, атай-әсәйең бармы?

-Юҡ, атайым һәләк булды, беҙҙе әсәйем ҡарай.

«Тимәк кеҫә һай, бутҡа бешереп булмай»

-Һиңә, энем, Афғанға, хеҙмәт ит әле шунда...

Ике йыл үтеп китте...әсә улын көтмәне,

Сөнки ике ай элек, улын итеп ерләне.

Икенсеһенә алты, алты түгел, ун алты,

Ваҡыт еткәс “военкомға” ул да саҡырыу алды.

Пеләш башлы, шул ағай, эре генә күҙ ташлай

-Тәк-тәк энем, атай-әсәйең бармы?

Кеҫә яҡтары ҡалай?

Урап тормай, турыһын ярып һалды был ағай.

-Финанс яҡтары таҡыр, әсәйем ҡарай, бахыр...

-Аңлашылды, шымып тор, уйларға,- ти,- ваҡыт бир...

Белдем, һиңә Чечняға, беҙҙең сикте һаҡларға.

Кинйә ул менән әсә, Чечнянан улын көтә.

Көн артынан көн үтте, улы хеҙмәттән ҡайтты.

Улы ҡайтты, һыны, буйы, ҡиәфәте...

Ә ҡалғаны...әсә улын таныманы.

Һөйләүенең рәте юҡ, малайынан эҙ ҙә юҡ.

Малайын мәңгелеккә зәғифләгән шул Чечня...

Һорау килеп тыуа икән «Кем ғәйепле был эшкә?»

Яуап бер, бөтә ерҙә «Ғәйепле бары Чечня!»

Әсә инде уйланды, һис йоҡоға талманы

Кинйә бит үҫеп килә, уға ун алты тула...

Әсә инде ҡартайған, ҡартайған, һарғайған

Был донъяла әсәнең күрмәгәне ҡалмаған...

​

Шәмсетдинова Әлмира Илдус ҡыҙы